Besta deild kvenna: ÍBV skaust upp fyrir Stjörnuna

ÍBV er komið upp fyrir Stjörnuna og í þriðja sæti Bestu deildar kvenna eftir 3-2 sigur á Garðbæingum á Hásteinsvelli í kvöld.

Eyjakonur fengu draumabyrjun og komust í tveggja marka forystu með mörkum á aðeins einnar mínútu kafla.

Edda Dögg Sindradóttir sendi góðan bolta inn fyrir vörn Stjörnunnar á Allison Grace Lowrey. Hún vann kapphlaupið við Sydney og kláraði færið af öryggi.

Aðeins mínútu síðar kom annað markið. Fridrikka Marie Clementsen sendi fyrir frá vinstri og Ágústa María Valtýsdóttir stýrði boltanum fram hjá Bridgette í marki Stjörnunnar.

Garðbæingar unnu sig aftur inn í leikinn og Murielle Tiernan minnkaði muninn eftir frábæra sendingu Huldu Hrundar Arnarsdóttur.

Staðan var 2-1 í hálfleik en Eyjakonur endurheimtu tveggja marka forystuna snemma í þeim síðari.

Allison Grace skallaði þá hornspyrnu í varnarmann. Boltinn féll aftur fyrir hana og í annarri tilraun gerði hún engin mistök og skoraði sitt annað mark.

Stjarnan minnkaði muninn aftur þegar tæpur stundarfjórðungur var eftir. Kristín Klara Óskarsdóttir gerði slæm mistök inni í teignum og gaf boltann beint á Vigdísi Eddu Friðriksdóttur. Hún lagði hann fyrir Fanneyju Lísu Jóhannesdóttur sem kláraði snyrtilega í fjærhornið.

Stjörnukonur sóttu stíft á lokamínútunum og fengu færi til að jafna en nýttu þau ekki.

ÍBV fagnaði því 3-2 sigri og fer upp í þriðja sæti með 24 stig. Stjarnan fellur niður í það fjórða með 23 stig.