„Ég er ánægður með hópinn og hlakka til. Mér finnst þetta sterkt lið svo ég er spenntur fyrir þessu," sagði Erik Hamren landsliðsþjálfari Íslands við Fótbolta.net í dag en hann hafði þá nýlokið við að tilkynna leikmannahópinn sem mætir Andorra og Frakklandi í undankeppni EM 2020 síðar í mánuðinum.
Alfreð Finnbogason var valinn í leikmannahóp Íslands að þessu sinni en hann hefur verið frá keppni með félagsliði sínu, Augsburg í Þýskalandi upp á síðkastið.
„Hann er tilbúinn og ég held að hann muni spila með Augsburg á sunnudaginn. Það hafa komin góðar fréttir frá honum síðustu vikuna. Hann hefur æft vel og líður vel. Vonandi á hann góðan leik á sunnudaginn og verður klár í slaginn þegar hann hittir landsliðshópinn á sunnudaginn."
Jón Daði Böðvarsson leikmaður Reading var hinsvegar ekki valinn í hópinn enda enn að glíma við meiðsli.
„Hann er með svipuð meiðsli og Alfreð í kálfanum en það varð smá bakslag í meiðslum hans. Það getur alltaf gerst. Því miður getur hann því ekki verið með í næstu viku."
Birkir Már Sævarsson leikmaður Vals er áfram eini hægri bakvörður liðsins sem er valinn í leikmannahópinn en Erik hefur ekki áhyggjur af því enda geta margir spilað stöðuna.
„Þetta vandamál hefur verið lengi og meira að segja síðan áður en ég kom. Birkir Már er frábær maður og frábær leikmaður og ennþá virkilega góður," sagði hann.
„Við erum líka með aðra leikmenn sem geta spilað stöðuna. Ég hef engar áhyggjur af því ef hann yrði ekki klár af einhverri ástæðu. Rúrik gæti spilað þetta, Ari (Freyr Skúlason) er ekki bara vinstri bakvörður því hann spilaði hægra megin gegn Belgum, Hjörtur (Hermannsson) hefur spilað hægri bakvörð áður en ég kom hingað og Gulli (Guðlaugur Victor Pálsson) getur líka spilað þarna. Við erum með leikmenn sem geta spilað þessa stöðu."
Ísland mætir Andorra á föstudaginn í næstu viku en leikið er á gervigrasvelli ytra. Hamren segir í viðtalinu hér að ofan að Andorra menn séu mjög erfiðir á þeirra heimavelli.
„Þetta verður meiri áskorun en fólk heldur, við erum undir það búnir og munum undirbúa leikmennina undir það. Við verðum að standa okkur virkilega vel, bæði fótboltalega en helst andlega, vera sterkir! Við erum með marga leikmenn sem hafa spilað lengi fyrir Ísland og eru með góða reynslu úr undankeppni EM og HM og í úrslitakeppnum. Núna þurfum við þessa reynslu og þennan andlega styrk í þennan leik því hann er erfiðari en fólk heldur."
Síðan Hamren tók við íslenska liðinu síðasta sumar hefur liðið ekki unnið einasta leik og þann sænska þyrstir núna í að fara að sjá það gerast og ekki bara gegn Andrra heldur í leiknum gegn heimsmeisturum Frakka á mánudeginum þar á eftir.
„Ég er búinn að vera þyrstur lengi," sagði hann. „Markmiðið okkar er að vinna. Við höfum ekki gert það lengi en ég er viss um að það mun koma. Markmiðið er að vinna í Andorra, það er klárt og markmiðið er að ná í tvo sigra í tveimur leikjum. Við eigum alltaf tækifæri þegar leikurinn hefst og við verðum að nýta það."
Athugasemdir