14.07.22 - 16:52
Jóhann Þór Hólmgrímsson
Arnór Sig mættur aftur til Norrköpping (Staðfest)


Mynd: Fótbolti.net - Hafliði Breiðfjörð


Mynd: Fótbolti.net - Hafliði Breiðfjörð
Sænska félagið Norrköping hefur staðfest að Arnór Sigurðsson er genginn aftur til liðs við félagið.
Arnór lék með liðinu árin 2017-2018 áður en hann hélt til Rússlands en hann hefur verið á mála hjá CSKA Moskvu síðan. Hann var á láni hjá Venezia á Ítalíu á síðustu leiktíð en spilaði lítið.
Arnór, sem er 23 ára gamall, nýtti sér á dögunum sérstakt vinnuúrræði FIFA og frysti samning sinn við rússneska félagið CSKA Moskvu um eitt ár.
Arnór lék 66 leiki fyrir CSKA og skoraði 11 mörk. Hann á 21 landsleik fyrir Íslands hönd og skorað í þeim tvö mörk.
„Það er góð tilfinning að vera kominn heim. Félagið hefur verið í brasi og ég vil hjálpa þeim að komast þangað sem við eigum að vera, ég vil spila góðan bolta," sagði Arnór við undirskriftina.
