Meitlað í stein að Campbell velji Bandaríkin fram yfir Ísland - Bíður eftir kallinu frá Pochettino

Hann hefur spilað átta leiki fyrir yngri landslið Bandaríkjanna og skorað sex mörk. Campbell er alinn upp í Bandaríkjunum en er með íslenskan ríkisborgararétt.

Hann flutti til Íslands árið 2020 og spilaði með FH og Breiðabliki áður en hann gekk í raðir þýska stórliðsins Borussia Dortmund.

Hann yfirgaf Dortmund og var keyptur til Elversberg fyrir metfé í sumar, kaupverðið um sex milljónir evra. Hann hefur byrjað þrjá leiki Elversberg í Bundesliga á tímabilinu og skorað eitt mark.

„Ég er þegar búinn að taka ákvörðun um að skipta yfir í Bandaríkin. Það var af mörgum mismunandi ástæðum, en framtíð mín er hjá Bandaríkjunum. Ég sé ekki eftir neinu eða neitt slíkt. Þetta er eitthvað sem er meitlað í stein fyrir mér,“ sagði Campbell í samtali við þýska miðilinn Bulinews.

Hann vonast til að vera í næsta landsliðshóp Bandaríkjanna sem verður tilkynntur á næstu dögum. „Ég einbeiti mér bara að því að standa mig eins vel og ég get og ég bið þess að verða valinn í fyrsta sinn fljótlega. Það yrði draumur að rætast að spila fyrir Bandaríkin. Vonandi fæ ég kallið,“ sagði Campbell jafnframt.