Ari pirraður á bekknum: Er allt annar leikmaður en ég var fyrr í sumar

Þriðja mark Víkings skoraði Ari eftir vel tímasetta sendingu frá Helga Guðjónssyni. KR-ingar kölluðu eftir rangstöðu en niðurstaðan sú að Ari var réttstæður.

„Ég ætla ekki að ljúga því, ég hélt ég væri rangur. Þetta var ekki fínt 'finish' en boltinn fór inn einhvern veginn. Ég hélt þetta væri rangstæða en hann flaggaði ekki, það er eins og það er."

Ari hefur mikið verið á bekknum í sumar, byrjað fáa leiki eftir að hafa komið úr meiðslum í maí.

„Smá erfitt, var meiddur í ökklanum í vetur og svo reif ég allt í lærinu, þannig þetta er búið að vera ströggl. Ég er að koma til baka og menn sjá það inn á vellinum hvernig ég er að spila núna, á móti HK og hérna, ég er allt annar leikmaður en ég var fyrr í sumar."

„Þú sérð hópinn okkar, erum að vinna alla leiki, en auðvitað er ég pirraður að vera á bekknum. Það er bara svoleiðis."

Það eru sögur af áhuga á Ara erlendis frá. Er hann sjálfur meðvitaður um áhugann?

„Ég frétti af þessu í viðtali eftir HK leikinn. En þetta er bara áhugi, ekkert komið upp á borðið hjá mér. En ég mun skoða það ef það er eitthvað spennandi og gott fyrir minn feril," sagði Ari.