Villa-menn voru að spila á stærsta sviði Evrópuboltans í fyrsta sinn síðan tímabilið 1982-1983.

Liðið heimsótti Young Boys til Sviss og voru leikmenn ákveðnir í því að byrja þetta með stæl.

Það var svolítið snúið til að byrja með og Villa-menn reyndu að finna sig á undirlagi sem það er ekki vant, en Young Boys spilar heimaleiki sína á gervigrasvelli.

Young Boys var því með yfirhöndina fyrstu mínúturnar og allt stefndi í að heimamenn myndu gera fyrsta markið en þá tóku Villa-menn við sér og komust í forystu.

Lucas Digne tók hornspyrnuna stutt á John McGinn sem kom boltanum hátt inn á teiginn. Þar var Youri Tielemans einn og óvaldaður, fékk allan tímann í heiminum til að skjóta og setti boltann af öryggi í vinstra hornið.

Seinna mark Villa kom ellefu mínútum síðar eftir hörmulegan varnarleik heimamanna. Varnarmaður Young Boys gat hreinsað frá en ákvað í staðinn að senda boltann á markvörð liðsins. Ollie Watkins komst fyrir sendinguna en var tekinn niður í teignum. Það kom ekki að sök því Jacob Ramsey var mættur til að leggja boltann í netið.

Undir lok hálfleiksins kom Watkins boltanum í netið en markið dæmt af þar sem Englendingurinn handlék boltann í aðdragandanum.

Villa-menn byrjuðu vel í síðari hálfleiknum en voru í basli með að ná að gera endanlega út um leikinn. Diego Carlos, varnarmaður Villa, var nálægt því að gefa heimamönnum mark á silfurfati eftir slaka sendingu Brasilíumannsins en Emiliano Martínez kom til bjargar.

Heimamenn efldust aðeins við það og fóru að reyna á Martínez, en Argentínumaðurinn var öruggur í aðgerðum sínum. Stjarna helgarinnar, Jhon Duran, kom inn af bekknum hjá Villa og kom með svipaðan kraft og um helgina.

Hann kom boltanum í netið á 78. mínútu en aftur kom VAR heimamönnum til bjargar. Amadou Onana handlék boltann í aðdraganda marksins og staðan áfram 2-0.

Fimm mínútum fyrir leikslok kom markið sem gerði út um leikinn en það gerði Onana með hörkuskoti af 25 metra færi, neðst í vinstra hornið.

Lokatölur í Sviss, 3-0, Aston Villa í vil. Frábær byrjun hjá Villa-mönnum sem mæta næst Bayern München í byrjun október.

Þægilegt hjá Juventus

Ítalska stórliðið Juventus vann þá þægilegan 3-1 sigur á PSV Eindhoven í Tórínó.

Hinn 19 ára gamli Kenan Yildiz kom Juventus á bragðið með frábæru marki á 21. mínútu. Tyrkneska undrabarnið fékk boltann á vinstri vængnum, leitaði inn í teiginn og smellti honum í samskeytin hægra megin.

Bandaríski landsliðsmaðurinn Weston McKennie gerði annað markið sex mínútum síðar. Heimamenn keyrðu upp hægra megin og kom boltinn inn á teiginn á Dusan Vlahovic. Hann náði ekki að skýla boltanum og komst varnarmaður í boltann, sem rann síðan til McKennie sem skoraði af öryggi.

Nicolas Gonzalez, sem kom til Juve frá Fiorentina undir lok gluggans, gerði þriðja mark Juventus. Vlahovic kom með laglega sendingu inn á teiginn og á Gonzalez sem var einn á móti markverði. Gonzalez lyfti boltanum vinstra megin við markvörð PSV og í netið.

Ismael Saibari minnkaði muninn fyrir PSV seint í uppbótartíma og þar við sat. Lokatölur 3-1 fyrir Juventus sem mætir næst þýska liðinu RB Leipzig.

Úrslit og markaskorarar:

Juventus 3 - 1 PSV
1-0 Kenan Yildiz ('21 )
2-0 Weston McKennie ('27 )
3-0 Nicolas Gonzalez ('52 )
3-1 Ismael Saibari ('90 )

Young Boys 0 - 3 Aston Villa
0-1 Youri Tielemans ('27 )
0-2 Jacob Ramsey ('38 )
0-3 Amadou Onana ('86 )