Dagur gæti verið á leið til Slóvakíu - Skýrist eftir leikinn á morgun

Dagur Orri er sagður mjög ósáttur hjá Val eftir að félagið hafnaði 30 milljóna króna tilboði danska B-deildarliðsins Fredericia í hann undir lok félagaskiptagluggans.

Hann vill komast frá félaginu og gæti enn fært sig um set þar sem glugginn er opinn í nokkrum löndum. Hjörvar Hafliðason sagði í DocZone að Dagur væri þegar genginn til liðs við Zilina í Slóvakíu.

„Dagur Orri Garðarsson, leikmaður Vals, er genginn til liðs við Zilina í Slóvakía. Hann auðvitað missti af danska liðinu Fredericia í lok gluggans, en Slóvakarnar eru með þetta opið aðeins lengur og þeir keyptu hann held í gær alveg örugglega og fer á held ég ágætis pening fyrir Valsmenn,“ sagði Hjörvar í DocZone.

Samkvæmt heimildum Fótbolta.net er Zilina hins vegar ekki búið að ganga frá kaupunum en hefur mikinn áhuga á Degi og ætlar að fylgjast með honum gegn Þór á morgun. Félagaskiptaglugginn í Slóvakíu lokar annað kvöld og mun félagið taka ákvörðun eftir leikinn.

Dagur hefur skorað fjögur mörk í þrettán leikjum með Val í sumar og er samningsbundinn félaginu til 2030. Valsmenn eru sjö stigum fyrir ofan fallsæti í Bestu deildinni og var það ein ástæða þess að þeir vildu ekki selja hann til Fredericia.