Þýskaland: Union Berlin endurheimti toppsætið

Þýska toppbaráttan lítur skringilega út á upphafi tímabils þar sem FC Bayern er fimm stigum frá toppsætinu, með 12 stig úr 7 leikjum.

Union Berlin er óvænt á toppinum með 17 stig eftir sigur gegn Wolfsburg í dag.

Heimamenn voru mun sterkari aðilinn í Berlín í dag og unnu leikinn 2-0 án þess að fá marktilraun á rammann hjá sér.

Sheraldo Becker lagði upp fyrsta markið fyrir Jordan Siebatcheu og innsiglaði sjálfur sigurinn.

Union Berlin er með tveggja stiga forystu á Borussia Dortmund. Wolfsburg er í fallsæti með fimm stig.