Mikill liðsstyrkur til Víkinga - Jón Guðni, Valdimar og Pálmi Rafn sömdu (Staðfest)

Jón Guðni Fjóluson samdi til tveggja ára. Hann er 34 ára og hefur verið á meiðslalistanum síðustu tvö ár. Hann sleit krossband undir lok árs 2021 og fór í kjölfarið í aðgerð, en fékk bakslag í endurhæfingunni vegna þrálátrar sýkingar í fæti. Hann kvaddi sænska félagið Hammarby í síðasta mánuði en miðvörðurinn spilaði aðeins 33 leiki á tæpum þremur árum sínum hjá félaginu.

Hann á átján A-landsleiki á ferilskrá sinni. Hann lék með Fram hér á landi til 2011 þegar hann fór í atvinnumennsku og spilaði í Belgíu, Svíþjóð, Rússlandi og Noregi.

Valdimar Þór Ingimundarson samdi til fjögura ára. Hann er 24 ára sóknarleikmaður sem hefur verið hjá norska liðinu Sogndal síðan í janúar á síðasta ári. Hann skoraði sjö mörk og átti sex stoðsendingar í 27 leikjum í norsku B-deildinni á liðnu tímabili.

Hann sló í gegn með Fylki í efstu deild sumarið 2020 og var í kjölfarið seldur til Strömsgodset. Hann hefur lekið tvo A-landsleiki, vináttulandsleiki gegn Sádi-Arabíu og Úganda sem fram fóru í fyrra.

Pálmi Rafn Arinbjörnsson er markvörður sem samdi til fjögurra ára og er fenginn í stað Þórðar Ingasonar varamarkmanns sem langði skóna á hilluna í síðustu viku. Hann kemur frá Wolves á Englandi þar sem hann hefur spilað með varaliði félagsins: U21 liðinu. Hann var keyptur til Wolves frá Njarðvík eftir tímabilið 2019 og hefur verið hjá Wolves síðan.

Hann hefur varið mark U21 liðsins tvisvar í deildinni í vetur en hefur verið fjarri góðu gamni að undanförnu vegna meiðsla. Pálmi á að baki einn keppnisleik í meistaraflokki. Hann varði mark Skeid í norsku B-deildinni í lok tímabilsins 2022 en hann var þar á láni frá Wolves. Hann á að baki átján leiki fyrir yngri landsliðin.