„Mjög ánægður með leikinn hjá leikmönnunum. Þær settu hann vel upp og þær framkvæmdu líka uppleggið mjög vel “ sagði Kristján Guðmundsson, annar þjálfara Vals, eftir 1-2 sigur gegn FH í Kaplakrika í dag.
Lestu um leikinn: FH 1 - 2 Valur
Kristján segir uppleggið hafa verið það að leikmenn ættu að sína sínar bestu hliðar en það hefur gengið brösulega hjá Valsliðinu á þessari leiktíð. „Þær myndu nú aðeins sína fjaðrirnar og láta sér líða aðeins betur á vellinum og þær gerðu það. Með því að gera það þá framkvæmdu þær uppleggið mjög vel.“
Eins og áður segir hefur tímabilið ekki gengið neitt sérstaklega vel hjá Völsurum og því voru þetta kærkomin 3 stig svona rétt fyrir mánaðar langa EM pásu í deildinni. Þau hljóta að vera guðslifandi fegin að fara ekki inn í pásuna með 9 stig eftir 10 leiki:
„Það er sko alveg hárrétt hjá þér. Það hefðu verið ansi langar vikur og sérstaklega þegar við erum að missa lykilleikmenn í landsliðsverkefnin og í burtu í einhvern tíma þá hefði verið svona erfiðara að leggja eitthvað upp fyrir seinni hlutann en þetta gefur okkur byr undir báða vængi og við förum léttari inn í þetta hlé.“
Viðtalið við Kristján má sjá í heild sinni í spilaranum hér að ofan.
