Heimir: Geggjað að vinna á einum erfiðasta útivelli deildarinnar
Mynd: Fótbolti.net - Jónína Guðjörg Guðbjartsdóttir
Mynd: Fótbolti.net - Jónína Guðjörg Guðbjartsdóttir
<i>„Ég er gríðarlega ánægður með þennan sigur. Við höfum verið í brasi á útivöllum, gerðum jafntefli í fyrstu umferðinni á móti Fram og töpuðum svo þremur útileikjum. Það var geggjað að ná að vinna hérna á einum erfiðasta útivelli deildarinnar. Mér fannst við vinna vel fyrir því,"</i> sagði Heimir Guðjónsson þjálfari FH eftir 2 - 3 sigur á ÍBV í Bestu-deild karla í kvöld en leikið var á Hásteinsvelli í Vestmannaeyjum.
Leikurinn var mjög daufur í fyrri hálfleik og þó hvort lið hafi skorað eitt mark var lítið um færi.
„Þetta opnaðist í seinni hálfleik en fyrri hálfleikurinn hafði verið svolítil stöðubarátta. Það vantaði bara að hafa smá hugrekki og vera kaldir á boltanum og spila honum. Það var fullt af tækifærum til þess. Mörk opna leiki og leikurinn opnaðist og varð hin fínasta skemmtun í seinni hálfleiik. Við sýndum frábæran karakter að koma inn þessu sigurmarki."
Er ekki alltaf sætt að skora í lokin á svona erfiðum og blautum og þungum velli?
„Völlurinn var þungur en mér fannst hann góður. Miðað við aðra grasvelli er þessi mjög fínn. Það er alltaf gott að skora í restina því þá er ekki mikill tími fyrir hitt liðið til að jafna."
