Gætu fallið þrátt fyrir að enda með betri árangur en Keflavík

Lokaumferð Bestu deildarinnar fer fram næstkomandi laugardag og hefst hún á slaginu 14:00. Mesta spennan er í neðri hlutanum en Akureyrarliðin tvö berjast fyrir lífi sínu í deildinni.

Sú sviðsmynd gæti þó komið upp að lið í efri hlutanum endi með lakari árangur en lið sem myndi falla.

Ef bæði KA og Þór vinna á laugardag og Keflavík tapar gæti KA fallið þrátt fyrir að enda ofar en Keflavík hefði deildinni ekki verið tvískipt. Yrði það í fyrsta sinn sem það gerist frá því að tvískiptingin hófst árið 2022.

Keflavík er með 29 stig í 6. sæti en KA er í 11. sæti með 26 stig. KA getur einungis jafnað Keflavík að stigum en mjótt á munum er á markatölu.

Ef Keflavík tapar með einu marki og KA vinnur með einu eru liðin jöfn á markatölu. Þá er horft til hversu mörg mörk liðið hefur skorað og þar hefur KA vinninginn.

Eftir gott gengi Keflavíkur í venjulegu móti hefur verulega dregið undan árangri liðsins í tvískiptingunni. Keflavík hefur aðeins sótt eitt stig eftir að deildinni var skipt.