Sterkust í 16. umferð - Varði víti frá vinkonu sinni

„Ekki hægt að velja neinn annan mann leiksins," skrifaði Snæbjört Pálsdóttir í skýrslu sinni frá leiknum.

„Hélt hreinu í Kaplakrika gegn einu besta sóknarliði deildarinnar og varði vítaspyrnu undir lokin. Hún varði og varði, var róleg, örugg í öllum sínum aðgerðum og stjórnaði sínum konum fyrir framan sig!"

Telma bjargaði Víkingi undir lok leiksins með því að verja vítaspyrnu frá Ásdísi Karen Halldórsdóttur.

Víkingur keypti Telmu í síðasta mánuði frá skoska félaginu Rangers og á hún að hjálpa liðinu að halda sætinu í deildinni. Víkingar eru sem stendur á botninum en þessi sigur gegn FH gerir mikið fyrir liðið.

„Ég segi það nú ekki að ég hafi verið búin að lesa hana alveg, en ég er örugglega búin að þekkja Ásdísi í 14 ár eða eitthvað. Við erum mjög góðar vinkonur," sagði Telma eftir leikinn um vítið.

„Það er búin að vera smá brekka hjá okkur og við höfum fengið allt of mikið af mörkum á okkur í sumar. En mér fannst við sýna það hérna í dag að við erum ekki nærri því hættar og við ætlum ekkert að gefast upp núna. Það er nóg eftir.“