Grindavík kaupir Adam Árna frá Vogum (Staðfest)

Adam Árni er 24 ára sóknarmaður sem skoraði 13 mörk í 20 leikjum með Þrótti í 2. deildinni í sumar.

Hann hefur verið eftirsóttur af liðum í Lengjudeildinni en Grindvíkingum tókst að festa kaup á honum.

Adam skrifar undir tveggja ára samning við Grindavík en hann á 34 leiki að baki í næstefstu deild á Íslandi. Í þeim skoraði hann 14 mörk á dvöl sinni hjá Keflavík, áður en hann gekk til liðs við Vogamenn fyrir síðustu leiktíð.

Adam á einnig 5 mörk í 51 leik í efstu deild með Keflvíkingum.

Hann hefur verið funheitur í sínum fyrstu æfingaleikjum með Grindavík, þar sem hann er kominn með fjögur mörk í tveimur leikjum gegn ÍBV og HK.

„Ég er virkilega spenntur fyrir því að ganga til liðs við Grindavík. Hér er verið að stefna hátt og þvílíkur metnaður til þess að gera vel. Ég hlakka til að kynnast strákunum og öllum þeim sem koma að liðinu og vonandi getum við hjálpast að við að ná þessum markmiðum og þeir hjálpað mér að verða betri leikmaður," sagði Adam Árni meðal annars við undirskriftina.