Manchester City vann nauman sigur á Bournemouth í kvöld en Phil Foden skoraði eina mark leiksins í fyrri hálfleik.
Það hefur verið mikið álag á leikmannahópi Manchester City en liðið vann þrennuna á síðustu leiktíð og spilaði því þvílíkt magn af leikjum.
Liðið átti erfitt uppdráttar fyrri hluta tímabilsins í ár en hefur verið á fullu skriði að undanförnu. Pep Guardiola hrósaði leikmönnunum sínum en gagnrýndi fyrirkomulagið í viðtali á Sky Sports eftir leikinn í kvöld.
„Ég dýrka leikmennina mína, þeir eru ofurmenni, þeir spila þriðja hvern dag. Þegar fólk spyr hvort við getum haldið sama dampi í úrvalsdeildinni er svarið nei. Við spilum fleiri leiki en allir aðrir. Takk fyrir skipulagið, þetta er of mikið en við verðum að halda áfram," sagði Guardiola.