Spá þjálfara og fyrirliða fyrir Lengjudeildina: 9. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. Leiknir R., 100 stig
10. Fjölnir, 82 stig
11. Selfoss, 49 stig
12. Völsungur, 24 stig

9. Leiknir R.
Til þess að gera betur en þessi spá segir til um þá þurfa Leiknismenn svo sannarlega að byrja betur en þeir gerðu í fyrra. Leiknir var á botni deildarinnar lengi vel og eftir sjö leiki var liðið aðeins með þrjú stig. Útlitið var ekki gott en svo voru gerðar þjálfarabreytingar. Gamla hetjan Óli Hrannar Kristjánsson sneri aftur í Breiðholtið og við það vöknuðu Leiknismenn til lífsins. Þeir fóru á Akureyri og unnu þar útisigur á Þór og var það annar sigur sumarsins. Í kjölfarið komu fleiri sigrar og þetta var frekar þægilegt fyrir Breiðhyltinga í lokin. Þeir héldu sér uppi en voru frekar langt frá umspilinu. Og það sem var erfitt líka var það að ÍR, þeirra erkifjendur, komust í umspilið og áttu frábært sumar. Núna er ÍR-ingum spáð fyrir ofan Leikni og það ætti að kveikja neista í þeim bláu og vínrauðu.

Þjálfarinn: Óli Hrannar Kristjánsson tók við Leikni snemma síðasta sumar af annarri gamalli hetju, Vigfúsi Arnari Jósepssyni. „Ole's at the wheel," sögðu einhverjir en undir stjórn Óla þá komu stigin í hús sem dugðu til að halda liðinu uppi mjög þægilega. Ólafur er uppalinn Leiknismaður og fyrrum fyrirliði liðsins, 34 ára gamall. Hann var að þjálfa í yngri flokkum Þróttar Reykjavík áður en hann sneri aftur í Breiðholtið. Hann hefur talað um að þetta sé ákveðið draumastarf og skrifaði hann undir áframhaldandi samning í október síðastliðnum. Nemanja Pjevic, sem er efnilegur þjálfari, verður áfram aðstoðarmaður hans í sumar.

Álit Badda
Baldvin Már Borgarsson, þjálfari Árbæjar, er sérfræðingur Fótbolta.net fyrir Lengjudeildina. Hann rýnir í öll liðin fyrir tímabilið sem er framundan.
Leiknisliðið spennandi en viðkvæmt
„Leiknismenn eru með áhugavert verkefni í gangi, þeir misstu marga burðarása í liðinu frá því í fyrra en voru klókir á markaðnum með því að sækja Dag Inga Hammer, Axel Frey og nú síðast Óskar Jóns. Það er þó skarð eftir Omar Sowe sem er svolítið spurningamerki; Leiknismenn vantar meiri breidd og þá samkeppni í framherjastöðuna við Hammerinn. Ingir uppaldir leikmenn munu fá stór hlutverk og fylla skörðin sem voru hoggin í leikmannahópinn eftir síðasta tímabil."

„Leiknismenn verða þó að sækja markmann til að berjast við Bjarka eða styrkja stöðuna enn frekar. Einnig er spurning með hafsent eftir að Andi Hoti fór, hvort sem það yrði styrking í byrjunarlið eða breidd. Hópurinn er frekar þunnskipaður og má lítið við frekari skakkaföllum, Karan Gurung meiddist því miður frekar illa að mér skilst um daginn svo þeir eru brothættir."

„Mér finnst Leiknisliðið spennandi en viðkvæmt. Mikil ástríða er í Breiðholtinu og þjálfarateymið alið upp í húsinu, það hafa allir hjarta fyrir félaginu og þeir geta farið langt á því."

Leiðin úr Lengjunni er hlaðvarpsþáttur tileinkaður næst efstu deild karla í fótbolta. Þáttarstjórnendur eru Stefán Marteinn Ólafsson, Sverrir Örn Einarsson og Sölvi Haraldsson. Þeir velja tvo lykilmenn og einn sem gaman verður að fylgjast með úr hverju liði í Lengjudeildinni.

Lykilmenn: Daði Bærings Halldórsson og Dagur Ingi Hammer Gunnarsson
Daði Bærings er einn mikilvægasti leikmaður Leiknisliðsins og er maðurinn sem bindir varnarleikinn saman. Leiknisfólkið dýrkar manninn og hann er með alvöru Leiknishjarta sem smitar út frá sér í aðra leikmenn. Daði verður að eiga gott sumar í hjarta varnarinnar hjá Leikni ef Breiðhyltingar ætla sér í umspilið í sumar. Dagur Ingi Hammer kom frá Grindavík í vetur til Leiknis og hefur verið sprækur á undirbúningstímabilinu. Leiknisfólk bindir miklar vonir til hans en það verður mjög áhugavert að fylgjast með honum í Leiknistreyjunni í sumar. Dagur skoraði 10 mörk í 21 leik í Lengjudeildinni í fyrra með Grindavík, þá skoraði hann þrjú mörk í deildarbikarnum í vetur. Grindvíkingurinn gæti tengt mjög vel við Shkelzen Veseli í sumar en þeir tveir gætu myndað mjög skemmtilegt dúó sem verður erfitt að stoppa.

Gaman að fylgjast með: Shkelzen Veseli
Ungur og uppalinn Leiknismaður sem hefur verið að taka skrefið ár eftir ár. Leiknisfólk er mjög spennt að sjá hvernig Veseli mun standa sig í sumar. Veseli gæti verið einhverskonar X-factor Leiknisliðsins í Lengjudeildinni, kannski eitthvað sem þeir söknuðu á köflum í fyrra. Í fyrrasumar skoraði hann fimm mörk í Lengjudeildinni fyrir Leikni, 20 ára gamall. Hann hefur litið mjög vel út á undirbúningstímabilinu í vetur og gæti fengið lyklana af sóknarleik Leiknis í sumar ef allt fer vel. Shkelzen Veseli er leikmaður sem gæti sprungið út á þessu keppnistímabili, þetta er einn mest spennandi leikmaður deildarinnar.

Komnir:
Axel Freyr Harðarson frá Fjölni
Dagur Ingi Hammer Gunnarsson frá Grindavík
Anton Fannar Kjartansson frá Ægi
Jón Arnar Sigurðsson frá KR (á láni)
Óskar Jónsson frá Fram

Farnir:
Andi Hoti í Val
Omar Sowe í ÍBV
Hjalti Sigurðsson í KR
Róbert Hauksson í Fram
Viktor Freyr Sigurðsson í Fram
Arnór Ingi Kristinsson í ÍBV
Ósvald Jarl Traustason hættur



Fyrstu þrír leikir Leiknis:
2. maí, Þróttur R. - Leiknir R. (AVIS völlurinn)
9. maí, Leiknir R. - Þór (Domusnovavöllurinn)
16. maí, Leiknir R. - HK (Domusnovavöllurinn)