Costinha í leik gegn Ajax í deildarkeppni Meistaradeildarinnar í janúar.
Brighton er í viðræðum við gríska stórveldið Olympiakos um kaup á portúgölskum hægri bakverði.
Sá heitir Costinha og er 26 ára gamall. Brighton er talið vera í leit að tveimur leikmönnum í þessa stöðu eftir að hafa tryggt sér sæti í Sambandsdeildinni, til að breikka hópinn og fylla í skarðið fyrir Joel Veltman sem virðist vera á förum þegar samningurinn rennur út í sumar.
Brighton hefur fylgst með Costinha í dágóðan tíma og er leikmaðurinn talinn henta vel fyrir leikstíl liðsins.
Costinha þótti gríðarlega mikið efni á táningsárunum og var lykilmaður í U19 landsliði Portúgal. Hann ólst upp hjá Rio Ave og lék 35 leiki fyrir yngri landsliðin áður en hann hélt til Grikklands fyrir tveimur árum.
Talið er að Brighton geti fest kaup á bakverðinum fyrir um 15 milljónir evra. Hann yrði annar leikmaðurinn sem Brighton kaupir úr röðum Olympiakos á einu ári eftir að félagið keypti Charalampos Kostoulas fyrir 35 milljónir evra í fyrrasumar.
