Burnley er komið aftur upp í ensku úrvalsdeildina eftir eitt ár í Championship, næst efstu deild. Burnley liðið var stórkostlegt í Championship-deildinni í fyrra og endaði í öðru sæti með 100 stig. Liðið fór í gegnum 33 leiki án þess að tapa en undir stjórn Scott Parker breyttist liðið heilmikið og fór eiginlega aftur í sömu einkenni og þekktust undir handleiðslu Sean Dyche. Varnarleikurinn var númer eitt, tvö og þrjú og var Burnley í fyrra langbesta varnarlið í nútímasögu Championship. Burnley fékk aðeins á sig 16 mörk í 46 leikjum - sem er magnað - og hélt 30 sinnum hreinu. Það var í raun ótrúlegt að Burnley hafi ekki unnið deildina miðað við árangurinn.

Burnley býr sig nú undir tímabilið 2025–26. Utan vallar er félagið orðið ansi áhugavert með fyrrum NFL stjörnuna JJ Watt í eigendahópnum og skemmtileg myndbönd á samfélagsmiðlum sem slá alltaf í gegn. Innan vallar er grunnurinn byggður á varnarsinnuðum leikstíl Scott Parker. Joe Hart, fyrrum markvörður Burnley og enska landsliðsins, sagði nýverið að Parker muni beita skipulögðu leikplani og spila þéttari leikstíl sem hentar betur til að lifa af í ensku úrvalsdeildinni en áhættusamur fótbolti Vincent Kompany sem kolfelldi Burnley síðast þegar liðið var uppi.

Varnarsinnaður leikstíll hefur áður hentað Burnley í ensku úrvalsdeildinni og það er spurning hvort að það verði aftur raunin núna. Það er mikið áfall að missa markvörðinn James Trafford núna stuttu fyrir mót en hann er að ganga í raðir Manchester City og félagið þarf svo sannarlega að fylla vel í hans skarð. Samkeppnin í neðri hluta deildarinnar er mikil og eins og staðan er núna búast flestir við því að sterkur varnarleikur verði ekki nóg og að Burnley fari lóðbeint aftur niður. Það hjálpar líka alls ekki að það er óvissa um Josh Brownhill, þeirra markahæsta leikmann á síðasta tímabil, og er hann samningslaus þessa stundina. Hann var líka fyrirliði liðsins og mikill leiðtogi.

Stjórinn: Scott Parker hefur fært Burnley stöðugleika og styrk síðan hann tók við stjórn liðsins sumarið 2024, eftir að Vincent Kompany fór óvænt til Bayern München. Á sínu fyrsta tímabili við stjórnvölinn kom Parker liði Burnley aftur upp með ótrúlega vel skipulagðan varnarleik að leiðarljósi. Það er ótrúlegur munur á fótboltanum sem Parker spilar með liðið miðað við hvernig þetta var hjá Kompany, sem reyndi að spila sóknarpressubolta, en það virkaði afar vel í næst efstu deild á síðasta tímabili. Núna fær Parker stærra próf en það hefur ekki gengið vel hjá honum í ensku úrvalsdeildinni með Bournemouth og Fulham. Núna þarf hann að gera betur.

Leikmannaglugginn: Burnley hefur sótt nokkuð marga leikmenn í glugganum en það verður að setja spurningamerki við það hvort þetta séu nógu góðir leikmenn til að hjálpa liðinu að halda sér uppi. Eins og áður segir að þá er líka mikið áfall að missa Trafford en hann er á leið til Man City.

Komnir:
Loum Tchaouna frá Lazio - 13 milljónir punda
Quilindschy Hartman frá Feyenoord - 10,2 milljónir punda
Marcus Edwards frá Sporting - 8,4 milljónir punda
Kyle Walker frá Man City - 5 milljónir punda
Max Weiss frá Karlsruhe - 4,3 milljónir punda
Jacob Bruun Larsen frá Stuttgart - 3,5 milljónir punda
Axel Tuanzebe frá Ipswich - Á frjálsri sölu
Zian Flemming frá Millwall - Óuppgefið kaupverð
Jaidon Anthony frá Bournemouth - Óuppgefið kaupverð
Bashir Humphreys frá Chelsea - Óuppgefið kaupverð

Farnir:
Andréas Hountondji til St Pauli - Á láni
CJ Egan-Riley til Marseille - Á frjálsri sölu
Josh Brownhill - Samningur rann út
Jonjo Shelvey - Samningur rann út
Nathan Redmond - Samningur rann út
Jeremy Sarmiento til Brighton - Var á láni

Líklegt byrjunarlið

Þrír lykilmenn:
Maxime Esteve er algjör lykilmaður í sterkum varnarleik Burnley og verður hann enn mikilvægari núna þegar Trafford er að fara til City. Hann er sterkur í loftinu, góður á boltanum og var gífurlega sterkur í Championship í fyrra. Esteve var líklega þeirra mikilvægasti maður í sterkum varnarleik. Hann er líka með reynslu úr ensku úrvalsdeildinni sem er gott.

Josh Cullen er gríðarlega vinnusamur miðjumaður sem átti frábært tímabil í Championship í fyrra. Það var aðeins Esteve sem spilaði fleiri mínútur en hann í liði Burnley og er hann mikilvægur í plani Scott Parker. Hann er öflugur alhliða miðjumaður sem er með góðar sendingar og frábær í að vinna boltann.

Zian Flemming er sterkur sóknarmaður sem var næst markahæsti leikmaður Burnley á eftir Brownhill í fyrra. Flemming var á láni hjá Burnley á síðustu leiktíð og var fenginn alfarið yfir í sumar. Hefur sýnt að hann getur skorað í Championship en núna er spurning hvort að hann geti tekið stökkið upp í ensku úrvalsdeildina og skorað þar.

Fylgist með: Mike Tresor er áhugaverður leikmaður sem stuðningsmenn Burnley skilja lítið í. Það var mikið umtal um hann eftir að hann stóð sig virkilega vel með Genk í Belgíu og var fenginn til Burnley en hann hefur lítið gert eftir að hann kom til Englands. Hann spilaði aðeins einn leik í fyrra og furðuðu stuðningsmenn Burnley sig á því. Eitthvað var í gangi á milli hans og Scott Parker en hann var líka eitthvað meiddur. Hann var í raun helst bara gleymdur. Stuðningsmenn Burnley vonast til að þessi hæfileikaríki kantmaður verði öflugur á komandi tímabili og minni á sig. Hannibal Mejbri er annar leikmaður sem á að fylgjast með; hárprúður miðjumaður sem var áður í akademíu Manchester United.

Besta og versta mögulega niðurstaða: Líklegasta niðurstaðan er sú að Burnley fari beint aftur niður í neðsta sæti og versta niðurstaðan er sú að það gerist og liðið minni á Southampton frá því í fyrra. Besta niðurstaðan fyrir Burnley er að liðið rétt bjargi sér frá falli.

Þau sem spáðu: Anton Freyr Jónsson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Ívan Guðjón Baldursson, Kári Snorrason, Mate Dalmay, Snæbjört Pálsdóttir, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ?
13. ?
14. ?
15. ?
16. ?
17. ?
18. ?
19. ?
20. Burnley, 22 stig

Athugasemdir

07:30

James tæp fyrir úrslitaleikinn