Jakob Snær Árnason leikmaður Þórs í Lengjudeild karla er á förum frá félaginu.
Hann hafði tekið þátt í öllum leikjum liðsins fyrir utan einn þegar kom að leiknum gegn Gróttu í síðustu umferð en þá var hann ekki í hóp og var heldur ekki í hóp í kvöld gegn Fram.
Orri Freyr Hjaltalín þjálfari Þórs var spurður út í fjarveru hans í viðtali eftir leikinn í kvöld.
„Hans mál eru í skoðun, við erum ekki með neitt í hendi hvað verður um hann í framtíðinni en þau mál ættu að skýrast á næstu dögum."
Er hann á förum frá félaginu?
„Það gæti farið svo, síminn hjá honum er örugglega ekki búinn að stoppa mikið en þau mál eru bara í vinnslu og það ætti að skýrast vonandi sem fyrst."
Jakob lék sinn fyrsta leik fyrir Þór árið 2015 og hefur verið lykilmaður síðustu þrjú tímabil. Hann hefur skorað tvö mörk í deildinni á þessari leiktíð og skoraði annað mark liðsins í 2-1 sigri á Grindavík í Mjólkurbikarnum.
Athugasemdir