Einkunnir Íslands:
Patrik Sigurður Gunnarsson - 6
Lítið sem hann gat gert í mörkunum og virkaði öruggari í sínum aðgerðum heldur en gegn Rússum.

Hörður Ingi Gunnarsson - 5
Var í brasi með sinn mann og smá bras hvort hann ætti að fylgja Daramy eða halda sig úti hægra megin. Daramy var í frekar frjálsri rullu úti vinstra megin hjá Dönum. Kom lítið út úr Herði sóknarlega og kannski heppinn að fá ekki á sig víti. Nær 4,5 en 5,5.

Ari Leifsson - 6
Heilt yfir flott frammistaða hjá Ara. Hann og Ísak virðast virka vel saman. Vann eitt skallaeinvigí inn á teig Dana en skallinn fór vel yfir. Það skal þó klárlega tekið fram að hann og Ísak litu ekki frábærlega út í 2. markinu. Frábær tækling í uppbótartíma hækkar Ara í sex.

Ísak Óli Ólafsson - 6
Var heilt yfir flottur í þessum leik, mikill andi í Ísak og hann fiskaði vítaspyrnuna. Lét aðeins teyma sig úr stöðu en virkaði vel með Ara. Sennilega einu 76 mínúturnar á mótinu þar sem hann fór af velli eftir að hafa fengið tak í annað lærið.

Kolbeinn Birgir Finnsson - 5
Fyrra markið kom hægra megin hjá Dönum, Kolbeinn lenti á eftir sínum manni. Var að öðru leyti fínn, mikil barátta og vann skallabolta, frábær tækling í fyrri hálfleik. Gott að hafa örvfættann leikmann vinstra megin.

Alex Þór Hauksson - 5
Alex náði illa að klukka Danina og virkaði hægur í kringum þá. Óx þó með leiknum og var flottur í um 45 mínútur.

Stefán Teitur Þórðarson - 5
Óx ásmegin í leiknum eftir erfiða byrjun og fékk sennilega besta færi Íslands eftir frábært spil. Danir komust því miður fyrir skot Stefáns af stuttu færi, dauðafæri.

Willum Þór Willumsson - 5
Komst minna í takt við leikinn miðað við gegn Rússum. Var betri varnarlega en kom ekkert frá honum fram á við.

Mikael Neville Anderson - 6
Flottir sprettir inn á milli, var full varnarsinnaður eins og allt liðið í byrjun en náði að valda usla með boltann og heilt yfir fín frammistaða.

Jón Dagur Þorsteinsson - 6
Gekk lítið í fyrri hálfleik en sýndi frábæra spretti í seinni hálfleiknum. Skiptingarnar hjálpuðu Jóni að einhverju leyti, tengdi vel við Ísak Bergmann. Jón krækti í góðar aukaspyrnur og augljóst að Danirnir höfðu áhyggjur af honum á sprettinum.

Sveinn Aron Guðjohnsen - 6
Þrátt fyrir klúðrað víti þá var Svenni hausverkur fyrir Danina og sást það. Dómari leiksins hélt ekki beint með Svenna og leyfði Dönunum að setja hendur ítrekað á hann í einvígum. Hefði verið a.m.k. sjöa ef vítið hefði ratað rétta leið.

Varamenn:
Andri Fannar Baldursson - 6
Kom inn á á 68. mínútu inn í hutverk Alex. Kom sterkur inn og með góða orku.

Ísak Bergmann Jóhannesson - 6
Kom inn á á 68. mínútu. Góð innkoma, góð hlaup. Virkaði augljóst að hann hentar betur inn á miðsvæðinu. Frábær sending á Stefán Teit.

Aðrir spiluðu of fáar mínútur til að fá einkunn