Þrír í banni í umferðinni eftir rauð spjöld

Tveir leikir verða í 9. umferð Bestu deildarinnar á morgun, föstudag, en umferðinni lýkur svo með fjórum leikjum á sunnudaginn.

Þrír leikmenn verða í banni vegna rauðra spjalda.

Sóknarmaðurinn Sverrir Páll Hjaltested í FH fékk rautt í 5-0 tapinu gegn Víkingi og verður ekki með gegn ÍA í Krikanum annað kvöld.

Hólmar Örn Eyjólfsson, fyrirliði Vals, verður í banni þegar Valur fær Íslandsmeistara Víkings í heimsókn á sunnudag en hann fékk tvö gul spjöld og þar með rautt þegar Valur tapaði gegn KR í vikunni.

Þá verður markvörðurinn Marcel Zapytowski hjá ÍBV í banni gegn Keflavík. Zapytowski fékk rautt spjald í 2-2 jafnteflinu gegn ÍA þrátt fyrir að hafa ekki spilað í leiknum. Hann fór út úr boðvangnum til að tefja í lok leiksins.

Ari i Haraldstovu hefur spilað í marki ÍBV síðustu leiki eftir að Zapytowski missti sæti sitt.