Hrannar Snær genginn til liðs við Aftureldingu (Staðfest)

Hrannar Snær getur bæði leyst stöðu hægri bakvarðar og hægri kanntmanns en hann fagnaði 22 ára afmæli sínu í gær.

Hann er uppalinn hjá KF og lék sinn fyrsta leik fyrir liðið árið 2018 þá 17 ára gamall. Hann hélt á Selfoss fyrir síðasta tímabil og lék 15 leiki af 22 í Lengjudeildinni.

Hann kvaddi liðið í síðasta mánuði eftir að það féll niður í 2. deildina en hann snýr nú aftur í Lengjudeildina þar sem Afturelding hafnaði í 2. sæti og tapaði úrslitaleik um sæti í Bestu deildinni gegn Vestra.

„Mér líst mjög vel á strákana og þjálfarana. Það var erfið ákvörðun að fara frá Selfossi en mér líst mjög vel á að spila með Aftureldingu. Ég fylgdist með liðinu síðasta sumar og líst vel á hvernig liðið spilar og hvernig þetta er samsett hérna,” sagði Hrannar eftir undirskrift en hann mun nú spila í treyju Aftureldingar með mosfellsku hljómsveitina KALEO framan á eftir að hafa spilað í treyju Selfyssinga síðasta sumar með hljómsveitinni Stuðlabandið framan á.

„Ég ætla ekkert að skjóta Stuðlabandið niður en ég er meira fyrir KALEO,” sagði Hrannar léttur.