Valur sýndi ekki sannfærandi frammistöðu í 1-1 jafntefli gegn Fram á Hlíðarenda í dag.
Valur tók forystuna undir lok fyrri hálfleiks og verðskuldaði Fram jöfnunarmark sitt á 87. mínútu.
„Við vorum ólíkir sjálfum okkur í dag og spiluðum ekki góðan leik. Við vorum svolítið að reyna að halda fengnum hlut þarna í seinni hálfleik og fengum það í andlitið. Eftir það rifum við okkur aðeins í gang en það var bara of seint," sagði Hólmar Örn Eyjólfsson miðvörður Vals.
„Þetta var off dagur hjá okkur og Fram voru flottir, þeir eru góðir með boltann og gera þetta erfitt fyrir andstæðinginn. Ég er pínu svekktur fyrir okkar hönd að hafa ekki náð að sýna okkar rétta andlit."
Hólmar er sammála þjálfara sínum Ólafi Jóhannessyni um að Framarar hafi átt skilið að jafna leikinn enda hafi gestirnir verið betri stóran hluta síðari hálfleiks.
„Við vörðumst ágætlega þrátt fyrir að hafa ekki átt okkar besta dag. Þeir fengu ekki mikið af opnum færum, við fengum mögulega fleiri opin færi en þeir. En eins og ég segi þá verðum við að sýna betri spilamennsku úti á vellinum."
Valsarar vildu fá dæmda rangstöðu þegar Fram jafnaði en Hólmar segist ekki vera búinn að sjá markið í endursýningu.
