„Við vitum vel að Rúnari líður vel í KR en miðað við allt hlýtur það að teljast spennandi kostur fyrir hann að fara til Lilleström, þar sem hann þekkir vel til. Það er þó alls ekki sjálfgefið að hann hætti í KR. En við þurfum að fá svar til að geta haldið áfram að vinna í okkar málum. Það er lykilatriði," sagði Kristinn Kjærnested, formaður knattspyrnudeildar KR, við Vísi í dag.
Rúnar Kristinsson er sterklega orðaður við norska úrvalsdeildarfélagið Lilleström. Ef Rúnar yfirgefur KR, hver gæti þá tekið við bikarmeisturunum? Til gamans setti Fótbolti.net saman lista yfir tíu möguleika.
Pétur Pétursson - Mun aðstoðarmaður Rúnars síðustu árin stíga upp og taka við sem aðalþjálfari?
Kristján Guðmundsson - Hefur náð góðum árangri sem þjálfari og þekkir til hjá KR eftir að hafa starfað við þjálfun yngri flokka í vesturbænum.
Ríkharður Daðason - Stýrði Fram til bikarmeistaratitils í fyrra en náði ekki samkomulagi um að halda áfram með liðið. Hefur síðan getið sér gott orð sem sérfræðingur í sjónvarpi. Er fyrrum leikmaður KR.
Brynjar Björn Gunnarsson - Aðstoðarþjálfari Stjörnunnar á liðnu tímabili. Getur hann sagt nei ef uppeldisfélagið leitar til hans? Margreyndur atvinnumaður.
Eyjólfur Sverrisson - Margir bíða spenntir eftir því að sjá Eyjólf taka við félagsliði. Hefur lengi þjálfað U21-landsliðið ásamt því að hann stýrði A-landsliðinu um tíma.
Þorvaldur Örlygsson - Hefur náð afar góðum árangri sem þjálfari. Góður árangur hans með HK í sumar og frammistaða sem sérfræðingur í Pepsi-mörkunum bættust við í hnappagatið.
Eiður Smári Guðjohnsen - Segir líkur á því að hann leggi skóna á hilluna. Sýndi leiðtogahæfileika sína sem leikmaður landsliðsins í undankeppninni fyrir HM. Er þjálfun næsta skref hjá Eiði?
Bjarni Guðjónsson - Þrátt fyrir brösótt gengi sem þjálfari Fram er Bjarni hátt skrifaður hjá KR. Captain Fantastic.
Guðmundur Benediktsson - Laus eftir að Breiðablik ákvað að semja ekki við hann að nýju. Kominn með aukna reynslu. Kostur sem KR gæti haft í huga?
Erlendur þjálfari - Uppgangurinn í íslenska fótboltanum gerir það að verkum að KR gæti fetað í fótspor KSÍ og leitað út fyrir landsteinana í leit að þjálfara, jafnvel til Skandinavíu eða Bretlandseyja.
Athugasemdir
