Kevin de Bruyne, miðjumaður nýkrýndra Englandsmeistara Manchester City, telur að Mohamed Salah, leikmaður Liverpool, verði valinn besti leikmaður Englands á þessu tímabili.

„Ef enginn úr okkar liði verður valinn þá held ég að hann eigi það skilið," sagði Belginn og hélt áfram. „Hann vinnur örugglega hvort sem er. Hann hefur verið ótrúlegur og þegar þú keppir við einhvern sem hefur skorað svo mörg mörk, þá vinnurðu ekki."

Hann sagðist einnig vera mjög ánægður með bæði frammistöðu sína og liðsins síns á þessu tímabili og skildi engan undra enda hefur hann verið lykilmaður í langbesta liði deildarinnar.

Manchester City varð Englandsmeistari í dag þegar nágrannar þeirra í Manchester United töpuðu 0-1 gegn botnliði WBA og eiga því ekki möguleika á að ná City þegar bæði lið eiga fimm leiki eftir af tímabilinu.