Hópurinn hjá Gian Piero Gasperini er nokkuð þunnur og því hefur félagið verið að bæta við sig leikmönnum í janúar.

Atalanta gekk endanlega frá kaupum á Duvan Zapata fyrr í mánuðinum auk þess að tryggja sér varnarmanninn öfluga Mattia Caldara á lánssamningi.

Á síðustu dögum hefur félagið bætt fjórum leikmönnum við sig til viðbótar, tveir koma á láni og tveir eru keyptir.

Lennart-Marten Czyborra og Bosko Sutalo kosta tæpar 10 milljónir evra samtals. Þeir eru báðir tvítugir, efnilegir varnarmenn.

Czyborra er þýskur vinstri bakvörður sem kemur frá Heracles og á leiki að baki fyrir U20 lið Þjóðverja. Hann tekur stöðu Guilherme Arana í hópnum, en Arana fékk lítið sem ekkert að spila á láni fyrri hluta tímabils.

Sutalo er fjölhæfur varnarmaður frá Króatíu. Hann kemur frá NK Osijek og á leiki að baki fyrir yngri landsliðin.

Hinn 19 ára gamli Raoul Bellanova kemur að láni frá Bordeaux. Hann getur leikið sem hægri bakvörður eða miðjumaður og hefur verið lykilmaður í unglingalandsliðum Ítalíu.

Adrian Tameze er 25 ára og kemur að láni frá Nice. Hann þótti mikið efni og spilaði fyrir yngri landslið Frakka en tók aldrei stökkið í A-landsliðið. Tameze leikur einnig sem varnarmaður.