Róberta Lilja Ísólfsdóttir er komin aftur heim í ÍA eftir að hafa eytt einu tímabili hjá KR en þetta var tilkynnt á dögunum. Unnur Ýr Haraldsdóttir og Aníta Sól Ágústsdóttir framlengdu þá samninga sína við félagið.
Róberta, sem er fædd árið 2001, er uppalin á Akranesi og spilaði 40 leiki í deild- og bikar áður en hún gekk í raðir KR fyrir síðasta tímabil.
Hún kom við sögu í tíu leikjum með KR síðasta sumar og spilaði þá með liðinu í Reykjavíkurmótinu í byrjun ársins en hefur nú fengið félagaskipti aftur yfir í ÍA. Samningurinn gildir út tímabilið.
Tvær af reyndustu leikmönnum ÍA, þær Aníta Sól og Unnur Ýr, framlengdu þá samninga sína við félagið.
Unnur er fædd árið 1994 og á 208 leiki og 83 mörk fyrir félagið en hún hefur alla sína tíð spilað með Skagaliðinu.
Aníta er fædd árið 1997 en hún hefur líkt og Unnur, spilað alla sína tíð hjá ÍA. Hún á 108 leiki og 4 mörk fyrir félagið. Þær framlengdu báðar út tímabilið.
Athugasemdir
