3. deild: Þriðji sigur KV í röð

KV er komið á gott skrið í 3. deild karla eftir 3-2 sigur á Ými í Kórnum í gær. Þetta var þriðji sigur Vesturbæinga í röð.

KV vann og tapaði til skiptis í fyrstu umferðunum, en liðið virðist nú hafa fundið taktinn og er komið af krafti inn í baráttuna ofarlega í deildinni.

Oddur Ingi Bjarnason kom KV yfir á 27. mínútu og Samúel Már Kristinsson bætti við öðru marki um miðjan síðari hálfleik. Steingrímur Dagur Stefánsson kom Ými aftur inn í leikinn á 74. mínútu, en sex mínútum síðar skoraði Einar Þórðarson mikilvægt þriðja mark KV.

Andri Már Harðarson minnkaði muninn fyrir Ými á 82. mínútu og gerði lokakaflann spennandi, en nær komust Ýmismenn ekki.

KV er í 4. sæti með 18 stig, aðeins fjórum stigum frá toppnum. Ýmir er í 7. sæti með 12 stig og án sigurs í síðustu þremur leikjum.