Pétur meiddist á æfingu með Breiðabliki í nóvember á síðasta ári, þar sem hann sleit krossband - í þriðja sinn á ferlinum.

Hann hefur verið að vinna í því að koma til baka en þarf tíma og mun líklega ekkert spila fyrr en á næsta ári.

„Hann mun ekki byrja að spila neitt fyrr en á næsta undirbúningstímabili," sagði Óskar Hrafn Þorvaldsson, þjálfari Breiðabliks, á fréttamannafundi í gær.

„Hann var í hóp en það var meira bara svo hann fengi að vera hluti af hópnum og einhvern veginn að vera með. Hann mun ekki spila neitt á þessu tímabili."

Það verður fróðlegt að sjá hvernig Pétur Theódór kemur inn í lið Blika á næstu leiktíð en hann raðaði inn mörkunum með Gróttu í næst efstu deild síðustu ár.