Heimir: UEFA verður að grípa inn í og gera eitthvað

Írar náðu forystunni með marki úr vítaspyrnu en Ísraelar jöfnuðu metin svo lokatölur urðu 1-1. Leikið var fyrir luktum dyrum í Serbíu og voru engar auglýsingar á auglýsingaskiltum vallarins.

Írar hafa kvartað undan því að þurfa að spila við Ísrael í Þjóðadeildinni og vill Heimir að UEFA haldi þjóðunum frá því að mæta hvorri annarri í framtíðinni.

„Þetta er ákvörðun sem UEFA þarf að taka en það er augljóst að þessar tvær þjóðir ættu ekki að mætast. Það er mjög mikill stuðningur við Palestínu á Írlandi, það eru ekki margar þjóðir sem styðja jafn mikið við Palestínu og sú írska," sagði Heimir eftir lokaflautið og neitaði að tjá sig um ryskingar leikmanna í göngunum á leið til búningsklefa þegar flautað var til leikhlés.

„Ég óska ekki neinni þjóð að þurfa að ganga í gegnum það sem við höfum þurft að ganga í gegnum síðustu tvær vikur. UEFA verður að grípa inn í og gera eitthvað í þessu."

Þess má geta að ísraelsku fréttamennirnir sem eyðilögðu fréttamannafund Heimis fyrir leik hafa verið bannaðir frá því að starfa í kringum leiki í framtíðinni. Annar þeirra hringdi á serbnesku lögregluna og kærði líkamsárás eftir að starfsmaður írska fótboltasambandsins hrifsaði hljóðnemann af honum eftir að Heimir gekk út af fundinum.