Ednaldo Rodrigues, forseti brasilíska knattspyrnusambandsins, staðfesti í viðtali í dag að Carlo Ancelotti sé efstur á óskalistanum til að taka við brasilíska landsliðinu.
Mikið hefur verið rætt um framtíð Ancelotti eftir að Real Madrid mistókst að vinna spænsku deildina og Meistaradeild Evrópu á tímabilinu, en Ancelotti á eitt ár eftir af samningi sínum við félagið og hefur ekki áhuga á að binda endi á það samkomulag.
Real Madrid virðist ekki ætla að reka ítalska þjálfarann en brasilíska knattspyrnusambandið hefur áhuga á að skoða hvort Ancelotti hafi áhuga á að stýra Brasilíu samhliða starfi sínu hjá Real Madrid.
Rodrigues ætlar að nýta æfingalandsleiki Brasilíu í sumar til að funda með Ancelotti og Florentino Perez, forseta Real Madrid.
„Carlo er ennþá plan A og við munum ræða saman í æfingaferðinni, þá mun framtíðin skýrast," sagði Rodrigues á fréttamannafundi í Rio de janeiro.
Brasilía mætir Gíneu og Senegal 17. og 20. júní en leikirnir munu fara fram á Spáni og í Portúgal.
