Ásgeir Sigurvins sjötugur í dag - „Okkar dáðasti sonur"

Í dag fagnar Ásgeir Sigurvinsson sjötugsafmæli en Ásgeir er einn allra besti fótboltamaður í sögu Íslands. Hann er Eyjamaður og er ÍBV á meðal hans fyrrum félaga sem óskar sínum manni til hamingju með daginn. Eyjamenn segja hann sinn dáðasta son.

Ásgeir lék með ÍBV, Standard Liege, Bayern München og Stuttgart á sínum ferli. Þá lék hann 45 landsleiki og skoraði í þeim fimm mörk. Hann var þjálfari Fram árið 1993 og svo íslenska landsliðsins 2003-2005.

Á heimasíðu Stuttgart í dag er birt grein um Ásgeir. Þar segir meðal annars:

„Framúrskarandi tækni, nákvæmar sendingar, mikill hlaupavilji og hættulegur fyrir framan mark andstæðinganna. Búinn þessum hæfileikum heillaði Ásgeir Sigurvinsson aðdáendur á Neckarstadion í Stuttgart og þýska boltans í heild sinni í átta ár. Íslenski landsliðsmaðurinn er enn talinn einn besti leikstjórnandi sem hefur klæðst treyjunni með rauða bringu borðanum."