England: West Brom fallið úr efstu deild (Staðfest)

West Bromwich Albion er fallið úr ensku úrvalsdeildinni eftir að hafa tryggt sér sæti í deildinni á síðustu leiktíð.

West Brom mátti ekki tapa gegn Arsenal á Emirates vellinum í dag en fyrir leikinn var liðið tíu stigum frá öruggu sæti.

Arsenal hefur oft spilað betur en liðinu tókst að kreista fram 3-1 heimasigur sem fellur Sam Allardyce og hans lærisveina.

Þetta er jafnframt í fyrsta sinn sem Allardyce fellur úr úrvalsdeildinni þrátt fyrir mörg, mörg ár sem þjálfari í deildinni.

Emile Smith-Rowe, Nicolas Pepe og Willian skoruðu mörk Arsenal sem tryggði liðinu þrjú stig og níunda sætið. Matheus Pereira gerði eina mark West Brom.

Arsenal er fjórum stigum frá Evrópusæti þegar liðið á þrjá leiki eftir óspilaða.