Glódís Perla Viggósdóttir
Glódís Perla Viggósdóttir fyrirliði Íslands stóð svo sannarlega í ströngu í leik Íslands gegn Spáni á Laugardalsvelli fyrr í kvöld. Lokatölur 6-1 fyrir heimsmeistaralið Spánar sem sýndi mátt sinn í kvöld. Glódís var til viðtals við Fótbolta.net að leik loknum og ræddi um leikinn.
Lestu um leikinn: Ísland 1 - 6 Spánn
„Auðvitað er maður bara hundfúl, það er aldrei gaman að tapa og hvað þá skít tapa. Auðvitað bara svekkjandi en svo veit maður líka hvað þær eru öflugar og við vorum ekki að gera nógu vel í að hindra þær í að spila sinn leik og þvi fór sem fór. “
Lið Spánar komst snemma yfir í leiknum en bætti við tveimur mörkum með skömmu millibili seint í hálfleiknum. Var það augnablikið sem að gerði út um leikinn?
„Við vissum að þetta væri brekka fyrir leik og fáum svo á okkur mark eftir fimm mínútur. Þá vissum við strax að þetta yrði ennþá erfiðara en náum ágætum tökum á leiknum í hálftíma. En svo er hundfúlt að fá á sig tvö mörk rétt fyrir hálfleik og er eitthvað sem á ekki að gerast hjá okkur.“
Sigrar Íslands á Úkraínu í riðlinum gera það samt að verkum að Ísland á auðveldari leið fyrir höndum í umspili um sæti á HM. Er Glódís bjartsýn fyrir hönd liðsins í komandi umspili?
„Ég ætla bara að vera hreinskilin ég veit ekki hvernig þetta umspil virkar og ég skil þetta ekki alveg. En auðvitað vill maður vera bjartsýn sem er kannski erfitt akkúrat núna þegar maður er langt niðri eftir þennan leik. Ég veit alveg hvað þessi hópur hefur í sér og hvað við getum á okkar dögum. Við bara náðum ekki þeim degi í dag.“
Sagði Glódís en allt viðtalið við hana má sjá hér að ofan.
