Breiðablik tapaði í úrslitum í eina skiptið sem B-deildarlið hefur unnið bikarinn

„Það hefur gerst einu sinni að lið úr næstefstu deild hefur unnið bikarinn, það var 1971 (Víkingur). Átján árum áður en ég fæddist. Það segir sig sjálft á hverjum pressan er fyrir þennan leik," sagði Magnús Már Einarsson, þjálfari Aftureldingar, í viðtali í gær.

Á söguvef Víkings er þessi sögulegi bikarmeistaratitill frá 1971 rifjaður upp en sama ár vann Víkingur B-deildina með yfirburðum.

Á leið sinni í úrslitaleikinn unnu Víkingar meðal annars Akureyringa og Akurnesinga og eftir 2-0 sigur gegn ÍA í undanúrslitum bikarkeppninnar sagði m.a. í Morgunblaðinu um Víkinga: „Þessi frammistaða þeirra er engin tilviljun. Liðið æfir að sögn vel og er skipað ungum og jöfnum leikmönnum og það sem meira er; þeir nenna að berjast og gefa aldrei eftir.“

Í úrslitaleiknum vann Víkingur einmitt sigur á Breiðabliki, 1-0, og skoraði Jón Ólafsson markið með þrumuskalla. Í Morgunblaðinu sagði að markið hefði verið „stórkostlega fallegt“ og í Vísi sagði Hallur Símonarson að þetta hefði verið „eitthvert fallegasta skallamark“ sem hann hefði séð.

Leikur Aftureldingar og Breiðabliks verður klukkan 19:00 annað kvöld á Laugardalsvelli.