Burnley tók á móti Newcastle United í ensku fallbaráttunni og úr varð hörkuleikur þar sem Jóhann Berg Guðmundsson var í byrjunarliði heimamanna.

Burnley var mun betra liðið í fyrri hálfleik og tók forystuna snemma þegar Matej Vydra skoraði eftir frábæra stoðsendingu frá Chris Wood.

Burnley komst nálægt því að tvöfalda forystuna en gestirnir frá Newcastle hefðu líklegast átt að fá dæmda vítaspyrnu sem var ekki dæmd. Staðan var því 1-0 í leikhlé.

Burnley hóf seinni hálfleikinn af krafti en Martin Dubravka gerði mjög vel á milli stanganna og hélt sínum mönnum í leiknum. Steve Bruce fékk nóg af slakri spilamennsku sinna manna og henti Allan Saint-Maximin og Callum Wilson inn á 58. mínútu til að breyta gangi mála.

Fyrsta sem Saint-Maximin gerði var að leika á varnarmann og leggja upp mark fyrir Jacob Murphy, sex mínútum síðar skoraði hann sjálfur eftir stórkostlegt einstaklingsframtak. Ótrúleg innkoma hjá Saint-Maximin sem gjörbreytti leiknum.

Allur kraftur virtist vera farinn úr liði Burnley og komust lærisveinar Steve Bruce nálægt því að skora þriðja markið undir lokin en James Tarkowski bjargaði á línu.

Niðurstaðan var því gríðarlega mikilvægur sigur fyrir Newcastle sem er núna sex stigum frá fallsvæðinu. Burnley er einu stigi ofar.

Jóhann Berg Guðmundsson spilaði allan leikinn og var tekinn útaf í uppbótartíma.