Aron í leik með Grindavík í sumar.
„Markið var ágætt og tryggði okkur stig í dag sem er fínt úr því sem komið var. Víðir skoraði ágætt mark sjálfur svo þetta var okkar dagur í dag," sagði Aron Jóhannsson leikmaður Grindavíkur sem skoraði glæsilegt mark beint úr aukaspyrnu gegn ÍBV í dag og tryggði þar með 2-2 jafntefli. Víðir Þorvarðarson leikmaður ÍBV hafði fyrr í leiknum skorað samskonar mark fyrir heimamenn í eyjum.
Lestu um leikinn: ÍBV 2 - 2 Grindavík
„Ég sá hvernig hann gerði þetta og ákvað að endurtaka leikinn," sagði Aron við Fótbolta.net eftir leik.
Hin tvö mörkin í leiknum voru svo sjálfsmörk sem hvort lið um sig skoraði.
„Þetta er svolítið spes. Ævintýrin gerast hérna í eyjum, það er nokkuð ljóst," sagði Aron en nánar er rætt við hann í sjónvarpinu að ofan.
Leikurinn var stopp í 20 mínútur eftir að Sigurjón Rúnarsson leikmaður Grindavíkur fékk höfuðhögg og þurfti að fara með sjúkrabíl af vettvangi.
„Hann var mættur hérna áðan og stóð í báða fætur sem er frábært. Hann var með klakapoka á hnakkanum og brosandi sem er fyrir öllu. Það er mjög ánægjulegt að það fór ekki verr," sagði Aron.
Athugasemdir
