Maður dagsins á HM - Akkerið á miðjunni

Rodri var frábær á miðsvæði Spánverja. Hann skoraði ekki og gaf ekki stoðsendingu, en hann var maðurinn sem stjórnaði hraða leiksins, kom boltanum hratt áfram og fann reglulega menn á milli línanna.

Fyrirliðinn hefur spilað alla leiki Spánar á mótinu og átt stóran þátt í því að liðið er komið alla leið í undanúrslit.

Fer í aðgerð eftir HM og missir af byrjun tímabilsins

Síðustu ár hafa verið Rodri erfið, eða allt frá því að hann sleit krossband í úrslitaleik Evrópumótsins fyrir tveimur árum.

Sama ár vann hann hin eftirsóttu Ballon d'Or verðlaun og varð þar með fyrsti Spánverjinn í 64 ár til að hreppa þau.

Á síðustu leiktíð lék hann aðeins 21 deildarleik, en hann var ýmist að glíma við meiðsli í hné, aftan í læri eða nára.

Eftir heimsmeistaramótið mun hann gangast undir aðgerð og missir því af byrjun tímabilsins með Manchester City. Það verður mikið högg fyrir bæði hann og City, sem fer inn í nýtt tímabil undir stjórn Enzo Maresca eftir brotthvarf Pep Guardiola.

Aðrir sem komu til greina sem maður dagsins voru Dani Olmo, sem átti afbragðsleik í sóknarleik Spánverja, og Lamine Yamal, sem var valinn maður leiksins af FIFA.

Það eru þó ekki allir sáttir við hvernig atkvæðagreiðslan fer fram þar, enda virðist hún að miklu leyti byggja á vinsældum frekar en frammistöðu.