Sirigu tekur við af Ospina (Staðfest) - Contini sendur til Samp

Hann er fenginn til að fylla í skarðið sem David Ospina skilur eftir sig og mun Sirigu berjast við samlanda sinn Alex Meret um byrjunarliðssæti.

Meret á aðeins eitt ár eftir af sínum samningi og gætu þessir markverðir því báðir yfirgefið Napoli á frjálsri sölu næsta sumar.

Sirigu er 35 ára gamall og hefur komið víða við á ferlinum. Hann var aðalmarkvörður PSG í fjögur ár og hefur síðan þá varið mark Torino og loks Genoa sem féll úr efstu deild á síðustu leiktíð.

Hann á 28 landsleiki að baki fyrir Ítalíu þrátt fyrir að hafa verið í samkeppni við tvo Gianluigi í heimsklassa - Buffon og Donnarumma.

Hinn úkraínski Nikita Contini hefur því verið lánaður burt frá félaginu og heldur hann til Sampdoria. Þar mun hann berjast við Emil Audero um byrjunarliðssæti. 

Contini er 26 ára gamall og hefur aldrei spilað keppnisleik fyrir Napoli á átta árum hjá félaginu. Hann hefur verið lánaður hingað og þangað um Ítalíu og lék bæði fyrir Crotone og Vicenza í Serie B á síðustu leiktíð. Bæði Crotone og Vicenza enduðu á að falla og leika í C-deildinni í haust.

Benvenuto Salvatore! #ADL pic.twitter.com/I9UQ6lDjNt

— AurelioDeLaurentiis (@ADeLaurentiis) August 11, 2022