Íslandsmeistarar

Frá 2016 til 2021 léku liðin 22 leiki, að undanskildu COVID-tímabilinu 2020, þegar keppni var hætt áður en öllum leikjum hafði verið lokið, en Valur var þá úrskurðaður Íslandsmeistari eftir 18 leiki. Frá og með 2022 hefur deildinni verið skipt í efri og neðri hluta eftir 22 umferðir og liðin leika því samtals 27 leiki í heildina. Erfitt er því að bera einungis saman stigafjölda liðanna heldur er best að líta á heildarfjölda stiganna og deila því á leiki spilaða, þar með fæst góður samanburður milli Íslandsmeistara þegar kemur að meðal stigum á leik.

Þar kemur í ljós að Íslandsmeistarar síðustu tíu tímabila hafa að meðaltali fengið 2,25 stig í leik, en það samsvarar um 49,5 stigum á 22 leikja tímabili og tæplega 61 stigi á 27 leikja tímabili. Það jafngildir því að vinna sjö og gera eitt jafntefli í hverjum tíu leikjum. Talsverður munur er þó á því hversu mörgum stigum deildin hefur verið að vinnast á. FH varð Íslandsmeistari árið 2016 með 43 stig, eða aðeins 1,95 stig að meðaltali í leik sem er lægsta talan í úrtakinu og jafnframt eina tímabilið þar sem meistararnir náðu ekki tveimur stigum í leik að meðaltali. Á hinum enda skalans eru Valur árið 2020 og Víkingur árið 2023 bestu Íslandsmeistararnir er horft er til meðalstigafjölda, en bæði náðu 2,44 stigum í leik. Tímabilið 2020 þarf þó að stjörnumerkja þar sem veiran skæða setti strik í reikninginn. Valur hafði safnað 44 stigum eftir 18 leiki þegar mótinu var hætt vegna heimsfaraldursins en liðið var sjóðandi heitt og aldrei að vita hvort það hefði unnið alla fjóra leikina og hækkað meðaltalið í 2,54 stig í leik. En á hinn bóginn hefði liðið getað slakað á og sótt lítið af stigum á lokakaflanum. 

Íslandsmeistararnir hafa að meðaltali verið með 7,7 stiga forskot á 2. sætið þegar talið er upp úr pokanum en miðgildið eru aðeins fjögur stig. Mesta forskotið var árið 2019 þar sem KR vann deildina og var með fjórtán stiga forskot á Breiðablik í 2. sætinu en það minnsta var árið 2021 þegar Víkingar unnu deildina með einu stigi meira en Blikar, á því sögufræga tímabili.

Ef litið er á núverandi tímabil má sjá að Víkingar hafa fengið 44 stig úr 17 leikjum, sem samsvarar um 2,59 stigum á leik, vel yfir meðaltalinu sem var 2,25 stig í leik. Það má því segja að allt bendi til þess að Víkingar verði Íslandsmeistarar en á eftir þeim eru Framarar með 2,18 stig í leik og fast á hæla þeirra fylgja KR-ingar með 2,12 stig í leik. Víkingar eru núna með 7 stiga forskot en eftir á að spila tíu umferðir.

Hversu mikið hafa Íslandsmeistararnir verið að skora?

Flestir eru sammála um að því fleiri mörk sem lið skora, því betri eru þau, en það er ekki alltaf markahæsta liðið sem stendur uppi sem sigurvegari í lok tímabils. KR liðið í ár er líklega eitt besta dæmið en liðið hefur skorað flest mörk allra liða í deildinni en það hefur aðeins skilað 3. sæti og átta stigum minna en topplið Víkings.