Sóknarmaðurinn Erling Haaland átti hreint út sagt magnaðan leik í gær þegar Manchester City vann 7-0 sigur á RB Leipzig í Meistaradeild Evrópu í gærkvöldi.
Haaland skoraði fimm af mörkum City í leiknum en hann er þriðji leikmaðurinn til að skora fimm mörk í einum Meistaradeildarleik; Luiz Adriano gerði það í leik með Shakhtar árið 2014 og Lionel Messi með Barcelona árið 2012.
Haaland er þá aðeins annar leikmaðurinn í sögunni til að fá tíu tvisvar sinnum í einkunn frá franska íþróttablaðinu L'Equipe.
L'Equipe eru harðir í sinni einkunnagjöf og það er mjög sjaldan sem leikmenn fá fullkomna tíu fyrir frammistöðu sína. Núna hefur Haaland afrekað það tvisvar en hann gerði það líka gegn Manchester United fyrr á tímabilinu.
Hinn leikmaðurinn til að fá tíu tvisvar er argentíski snillingurinn Lionel Messi.
Athugasemdir