Árbær tók á móti Sindra í 3. deildinni í dag og leiddi 1-0 eftir fyrri hálfleikinn.

Marko Panic skoraði eina markið en Snorri Már Skúlason, forráðamaður Árbæinga, fékk að líta rautt spjald skömmu fyrir leikhlé.

Gestirnir frá Höfn í Hornarfirði mættu grimmir til leiks í síðari hálfleikinn og jafnaði Viktor Ingi Sigurðarson metin á 58. mínútu.

Björgvin Ingi Ólafson kom Sindra svo yfir áður en Viktor Ingi skoraði sitt annað mark til að tvöfalda forystuna.

Staðan var þá orðin 1-3 fyrir Sindra þegar Daníel Gylfason fékk að líta rautt spjald í liði heimamanna. Árbæingar spiluðu lokamínúturnar því einum leikmanni færri og nýtti Abdul Bangura sér liðsmuninn.

Abdul skoraði tvennu í uppbótartímanum til að innsigla glæsilegan 1-5 sigur á útivelli.

Þetta eru dýrmæt stig fyrir Sindra sem er um miðja deild, með 9 stig eftir 7 umferðir.

Árbær er áfram í fjórða sæti með 13 stig, en sigur í kvöld hefði gert liðinu kleift að jafna 2. sæti deildarinnar á stigum.