Lengjudeild kvenna: Keflvíkingar í sjöunda himni - Sara Björk á bekknum en mátti ekki spila

Keflavík bar stórsigur á Haukum, 7-0, í Lengjudeild kvenna í kvöld.

Haukar höfðu verið í smá niðursveiflu og ekki unnið í þremur leikjum í röð eftir annars góða byrjun á tímabilinu á meðan Keflavík fékk þrjú stig gefins í síðustu umferð þar sem Tindastóll mætti ekki til leiks.

Heimakonur í Keflavík komust í tveggja marka forystu á rúmum tuttugu mínútum. Anita Linda Daníelsdóttir og nafna hennar, Anita Bergrán Eyjólfsdóttir, skoruðu mörkin.

Eva Dís Sighvatsdóttir bætti við þriðja undir lok fyrri hálfleiks áður en fjórða kom í upphafi síðari er Ásthildur Lilja Atladóttir setti boltann í eigið net.

Ariela Lewis kom sér á blað á 50. mínútu og gerði hún annað mark sitt níu mínútum síðar áður en Anita Lind gekk endanlega frá gestunum með marki undir lok leiks.

Stórsigur Keflvíkinga sem eru í 5. sæti með 13 stig en Haukar í 4. sæti með 14 stig.

Sara Björk Gunnarsdóttir kom heim úr atvinnumennsku og samdi við Hauka, en hún bíður eftir leikheimild. Hún var liðsstjóri í leiknum í kvöld, en áætlað er að hún verði með í næsta leik.