England: Ótrúlegt að Tottenham hafi náð stigi á Etihad

Manchester City og Tottenham gerðu 2-2 jafntefli í ensku úrvalsdeildinni í dag.

Englandsmeistararnir voru þó við algjöra stjórn allan leikinn og skoruðu gestirnir úr báðum skotum sínum sem rötuðu á rammann.

Raheem Sterling gerði vel að koma City yfir eftir sendingu frá Kevin De Bruyne en Erik Lamela jafnaði nokkrum mínútum síðar eftir slaka varnarvinnu heimamanna.

De Bruyne lagði svo upp fyrir Sergio Agüero og var staðan 2-1 í hálfleik en heimamenn hefðu hæglega getað verið búnir að skora meira.

Leikurinn hélt áfram í sama fari í síðari hálfleik, City menn vaðandi í færum en boltinn rataði ekki í netið.

Hinn lágvaxni Lucas Moura kom af bekknum og jafnaði fyrir Tottenham með sinni fyrstu snertingu. Hann vann þá skallabolta við Kyle Walker eftir hornspyrnu Lamela.

City hélt áfram að sækja og skapa sér færi en boltinn fann einhvern veginn ekki leiðina í netið. Gabriel Jesus kom knettinum loks í netið á 92. mínútu en markið ekki dæmt gilt þökk sé myndbandstækninni. Dómarinn dæmdi hendi í aðdraganda marksins.

Man City átti 30 marktilraunir á móti 3 og missir toppsæti deildarinnar í bili. Liðin eru jöfn með fjögur stig eftir tvær umferðir.