Það var stórleikur á dagskrá í kvöld á Diego Armando Maradona vellinum í Napoli þegar heimamenn fengu Inter Milan í heimsókn.

Inter er með góða forystu á toppi deildarinnar á meðan Napoli er í bullandi baráttu um sæti í Meistaradeild Evrópu.

Leikurinn var fjörugu og áttu bæði lið góð færi. Boltinn fór nokkrum sinnum í tréverkin í leiknum og gátu bæði lið stolið sigrinum.

Fyrsta mark leiksins kom á 36. mínútu og var það mjög skrautlegt. Lorenzo Insigne átti þá fyrirgjöfn sem Samir Handanovic, markvörður Inter, virtist vera búinn að grípa.

En þá kom Stefan de Vrij á fleygiferð og keyrði inn í Handanovic sem missti knöttinn í netið. Í fyrstu var markið skráð sem sjálfsmark á Handanovic en því síðar breytt á Stefan de Vrij.

Inter lét þetta ekki slá sig út af laginu og var það Daninn Christian Eriksen sem jafnaði metin á 55. mínútu með hörku skoti fyrir utan teig.

Bæði lið fengu sín færi til þess að klára leikinn en allt kom fyrir ekki. Inter er nú með níu stiga forystu á toppi deildarinnar á meðan Napoli er tveimur stigum á eftir Juventus sem situr í því fjórða.