Bjarki með 14 mörk í 12 leikjum fyrir unglingalið Dortmund

Unglingalandsliðsmaðurinn Bjarki Hrafn Garðarsson heldur áfram að raða inn mörkum fyrir U19 lið Borussia Dortmund. Hann skoraði í 2-2 jafntefli gegn Real Betis í Evrópukeppni unglingaliða í dag.

Bjarki kom Dortmund í 2-1 á 23. mínútu en Real Betis jafnaði fyrir hálfleik. Ekkert var skorað í seinni hálfleik.

Dortmund fékk hinn sextán ára gamla Bjarka, sem er stór og stæðilegur sóknarmaður, frá Stjörnunni í sumar. Hann er með 14 mörk í 12 leikjum fyrir unglingaliðið, mögnuð tölfræði.

Um síðustu helgi skoraði hann frábært mark úr aukaspyrnu í 2-0 sigri gegn Duisburg. Þá hefur hann einnig verið iðinn við kolann með yngri landsliðum Íslands.