Þýski sóknartengiliðurinn Mesut Özil er alvarlega að íhuga framtíð sína í fótbolta og gæti hann lagt skóna á hilluna eftir vonbrigðaár í Tyrklandi.
Özil fékk sig lausan frá Arsenal á síðasta ári eftir að hafa verið í frystikistunni hjá Mikel Arteta.
Hann hélt til Tyrklands og gekk í raðir Fenerbahce en það ævintýri gekk þó ekki eins og í sögu. Özil náði sér aldrei á strik og sagði Jorge Jesus, þjálfari liðsins, að Özil myndi ekki spila aftur fyrir félagið.
Nú er Özil að íhuga næstu skref ferilsins en það eru ágætis líkur á því að hann kalli þetta gott og leggi skóna á hilluna. Hann sér fyrir sér framtíð í rafíþróttum, en hann er stofnandi M10-liðsins, sem keppir í FIFA og Fortnite.
„Hann mun færa sig meira inn í rafíþróttaheiminn, spila sjálfur og jafnvel gerast atvinnumaður í greininni," sagði Erkut Sogut, umboðsmaður leikmannsins við Telegraph.
„Hann er rosalega góður í Fortnite, svona ef ég á að vera hreinskilinn og það kæmi mér ekki á óvart ef hann myndi keppa í rafíþróttum í framtíðinni," sagði hann ennfremur.
Athugasemdir