Markvörður Rosengard og þrjár aðrar til Liverpool (Staðfest)

Teagan Micah mun berjast við Rachael Laws um byrjunarliðssætið á milli stanga Liverpool í haust. Micah er 25 ára gömul og á 14 landsleiki að baki fyrir Ástralíu. Hún er í landsliðshópnum sem keppir á HM á heimavelli í ár og er með Írlandi, Kanada og Nígeríu í riðli.

Micah hefur unnið sænsku deildina síðustu tvö ár með Rosengard og á nokkra leiki að baki í Meistaradeild Evrópu með félaginu.

Natasha Flint er þá einnig gengin til liðs við Liverpool eftir að hafa gert frábæra hluti á láni hjá Celtic á seinni hluta síðustu leiktíðar. Flint kemur til Liverpool úr röðum Leicester City en þar áður lék hún meðal annars fyrir Blackburn Rovers og Manchester City.

Hún er 26 ára gömul og var lykilleikmaður upp yngri landslið Englands en tók aldrei stökkuð upp í A-liðið.

Varnarjaxlinn Jenna Clark er þá einnig gengin til liðs við Liverpool eftir að hafa verið mikilvægur hlekkur í liði Glasgow City. Clark er aðeins 21 árs gömul en á sex A-landsleiki að baki fyrir sterkt landslið Skota.

Clark gæti reynst algjör lykilmaður fyrir Liverpool en hún er hæstánægð með félagsskiptin þar sem hún kemur úr mikilli Liverpool fjölskyldu.

Að lokum er hin 18 ára gamla Mia Enderby búin að skrifa undir samning og kemur hún úr röðum Sheffield United. Hún var valin besti ungi leikmaður síðasta tímabils í ensku B-deildinni og spilar fyrir U19 landslið Englands.