Sölvi segir Erling ekki á förum frá Víkingi - „Það er engin umræða um það“

Erlingur hefur verið mikilvægur hluti af sigursælu liði Víkings undanfarin ár.

Hann er uppalinn hjá félaginu og hefur verið hluti af meistaraflokki þess frá árinu 2015, áður en gullaldarskeiðið hófst. Á þessum ellefu árum hefur hann spilað yfir 250 leiki fyrir félagið.

Erlingur hefur þrisvar orðið Íslandsmeistari með Víkingi og fjórum sinnum bikarmeistari.

Hinn 28 ára gamli Erlingur hefur fengið takmarkaðar mínútur að undanförnu og kom ekkert við sögu í 2-1 tapinu gegn Þór um helgina.

Samkvæmt heimildum Fótbolta.net hefur hann verið boðinn öðrum félögum, en Sölvi segir ekkert til í því að Erlingur sé á förum í þessum félagaskiptaglugga.

„Nei, það er engin umræða um að Elli sé á förum frá Víkingi. Við mátum það þannig að þetta lið var sterkast til að vinna í dag og þannig er það.“

„Hann er ferskur, er að æfa, tilbúinn að leggja á sig fyrir hópinn. Hann er búinn að vera partur af hópnum og koma inn á í leikjum og búinn að byrja leiki. Hann kom síðast inn á gegn Györ og gegnir sínu mikilvæga hlutverki,“ sagði Sölvi við Fótbolta.net.