Stubbur handarbrotinn og KA ætlar ekki á markaðinn

„Stubbur er meiddur, þess vegna var hann ekki með. Hann verður ekki með í næstu leikjum þar sem hann er handarbrotinn. Hann brotnaði á móti ÍA. Á myndum sést að hann lamdi mann í hausinn og fékk á sig víti, í því atviki braut hann á sér höndina," segir Haddi.

Fullt traust á Ívar
Hvernig metur þú stöðuna, eruð þið að skoða markaðinn í leit að markmanni?

„Nei, Ívar er frábær markmaður og býr yfir mikilli reynslu, sennilega mestu reynslunni af öllum markmönnum á hans aldri (fæddur 2006). Hann spilaði í Lengjudeildinni í fyrra með Völsungi, þar á undan með Hetti í 2. deild og tímabilið þar á undan varði hann mark KA í sigri á HK í Bestu deildinni. Hann hefur verið í öllum yngri landsliðum og er þroskaður andlega, ég hef engar áhyggjur af honum. Ég hef engar áhyggjur af honum og markmannsstöðunni. Ívar sýndi hversu góður hann er með frammistöðunni gegn ÍBV, hann var gjörsamlega frábær í gær."

Ívar á að baki 16 leiki fyrir yngri landsliðin og 44 deildarleiki á sínum ferli. Leikurinn í gær var hans annar deildarleikur fyrir KA.

Reiknar ekki með frekari liðsstyrk
KA hefur fengið Adam Ægi Pálsson og Andre Römer í glugganum. Þeir byrjuðu báðir í gær og Römer skoraði fyrra mark KA. Ef þú fengir að ráða, kæmu fleiri leikmenn í glugganum?

„Nei. Við erum með langan meiðslalista, það er ekkert leyndarmál. Auðvitað vilja þjálfarar oft einn leikmann í viðbót, en eins og staðan er núna held ég að við séum ekkert að fara í það. Við erum búnir að bæta við tveimur leikmönnum, menn eru að skríða til baka eftir meiðsli og þeir sem eru í langtímameiðslum eru sumir byrjaðir að æfa aðeins. Ég reikna ekki með því að við náum í fleiri leikmenn," segir Haddi.

Næsti leikur KA er heimaleikur gegn Þór eftir viku.